VACACIÓNS DE SEMANA SANTA

Hoxe é o último día antes das vacacións de Semana Santa, un día moi diferente a como o tiñamos planeado; encantaríame estar no cole, facendo unha festa e que saíran todos contentos,  coa carpeta do pitiño nas mans,  chea dos traballos que fixeron no cole; desexando chegar a casa para ensinarllas as  familias.

Ninguén contaba con que esto puidera pasar, pero esta é unha loita de todos, entre todos venceremos.

Xa podedes consultar as notas deste trimestre; aínda que nestes momentos tan difíciles, eso é o de  menos. Como xa sabedes,  infantil é un proceso continuo, hai nenos e nenas que xa adquiriron certos coñecementos e outros que lles falta pouco para acadalos, pero non hai presa.

Esta situación supuxo un frenazo brusco no seu desenvolvemento; traballaron moito durante estes meses e agora, no tempo que quedaba ata fin de curso, íanse ver os resultados.

Pero non pasa nada, eles están aprendendo en todo momento, e o tempo que están a pasar estes días con vós tamén é moi importante para o súa formación. Temos que intentar sacarlle o maior proveito posible.

É convinte que os nenos non perciban as vosas preocupacións; xogade moito con eles pero tamén teñen que colaborar nas tarefas do fogar e incluso na horta, axudando a plantar patacas, leitugas, cebolas...

Para eles o máis importante é,  estar cos seus pais; demostrándolle en cada momento o moito que os queredes.

Estes días festivos non vou a mandar traballos, pero podedes seguir mandando fotos para despois publicar no blogue.

Un bico grandísimo e moito, moito, moitísimo ánimo.